Snickers kaka

Snickers kaka

Mér var sagt að þetta væri ein besta kaka sem ég hef gert – og ég get alveg verið sammála því, hún er dásamlega góð! Þetta er rík og matarmikil lúxuskaka þar sem mjúkir súkkulaðibotnar mæta heimalagaðri karamellu, salthnetum og silkimúku súkkulaðikremi. *Það er upplagt að græja alla hlutana (botna, karamellu og krem) daginn áður og setja hana svo saman þegar þú ætlar að bera hana fram.

Súkkulaðibotnar

(ATH: 1 bolli = 2,3 dl)

  • 2 bollar hveiti
  • 2 bollar sykur
  • 3/4 bolli kakó
  • 2 tsk matarsódi
  • 1 tsk salt
  • 1 bolli súrmjólk
  • 1 bolli olía
  • 1 bolli heitt vatn úr krananum
  • 2 tsk vanilludropar
  1. Blandið öllum þurrefnunum vel saman í skál og blandið saman.
  2. Bætið restinni af hráefnunum út í og hrærið vel saman þar til deigið er slétt.
  3. Skiptið deiginu jafnt í tvö form (ca. 2 x 25 cm) sem hafa verið klædd bökunarpappír.
  4. Bakið við 175°C í 25-30 mínútur. Látið botnana kólna alveg.

Heimalöguð Hnetukaramella

  • 300g sykur
  • 150g smjör (við stofuhita, skorið í bita)
  • 180ml rjómi
  • 1/2 tsk salt
  • 200g salthnetur
  1. Hitið rjómann upp að suðu í litlum potti og takið af hitanum (mikilvægt svo hann sé heitur þegar hann fer út í sykurinn).
  2. Setjið helminginn af sykrinum á pönnu á meðalháan hita og bræðið hann niður. Bætið svo hinum helmingnum við og leyfið öllu að bráðna í gullna karamellu.
  3. Takið pönnuna af hitanum og hrærið smjörinu saman við þar til það er bráðnað.
  4. Hellið heita rjómanum varlega út í (gætið ykkur, það sýður mikið upp) og blandið vel saman. Setjið saltið út í lokin.
  5. Takið 1/3 af karamellunni frá og setjið í sér skál (fyrir toppinn). Restinni (2/3) blandið þið saman við salthneturnar í annarri skál og leyfið báðum blöndum að kólna.

Súkkulaðikrem

  • 225g smjör
  • 150g suðusúkkulaði
  • 150g rjómasúkkulaði
  • 120g flórsykur
  • 25g kakó
  • 1/2 tsk salt
  1. Setjið öll hráefnin saman í pott og bræðið yfir meðalhita þar til allt hefur runnið saman í slétt og gljáandi krem.
  2. Hellið kreminu í skál (eða eldfast mót til að flýta fyrir) og geymið í ísskáp í 2-3 klukkustundir svo það stífni og verði smurhæft.

Samsetning

  1. Setjið neðri botninn á kökudisk. Smyrjið þunnu lagi af súkkulaðikreminu ofan á.
  2. Setjið hluta af súkkulaðikreminu í sprautupoka. Sprautið hring með fram jaðrinum á botninum til að búa til „vegg“ sem heldur hnetukaramellunni inni.
  3. Hellið salthnetu-karamellublöndunni á mitt kremið og jafnið út. Setjið seinni kökubotninn ofan á.
  4. Smyrjið restinni af súkkulaðikreminu jafnt utan um alla kökuna og ofan á hana.
  5. Setjið karamelluna (sem var tekin frá) í sprautupoka. Sprautið henni í hringi ofan á kökuna, sléttið aðeins úr henni með spaða og búið til fallegt snúningsmynstur í miðjunni með endanum á spaðanum á meðan þú snýrð diskinum.
  6. Skerið Snickers í litla bita og raðið þeim fallega meðfram kanti kökunnar.

Berið fram og njótið með góðum kaffibolla eða ískaldri mjólk!